Félagið vinnur markvisst að því að draga úr umhverfisáhrifum starfseminnar og leggur mikla áherslu á að þekkja þau áhrif sem fyrirtækið hefur á náttúru og samfélag.

Einn liður í því er vöktun á nýtingu og mögulegum áhrifum starfseminnar. Í grænu bókhaldi fyrirtækisins er gerð grein fyrir niðurstöðum vöktunar árið 2018 með samanburði við fyrri ár.

Hér á eftir er gerð grein fyrir kolefnisspori ársins og við hvetjum lesendur til að skoða niðurstöður fyrir aðra þætti í græna bókhaldinu, sem má nálgast í heild sinni neðst á síðunni.

Bein losun vegna rafmagnsvinnslu fyrirtækisins
hefur dregist saman um 26% á síðustu tíu árum.

Við útreikninga á losun vegna starfsemi fyrirtækisins er farið eftir alþjóðlegu aðferðafræðinni Greenhouse Gas Protocol. Eins og kemur fram á myndinni hér fyrir neðan er losun skipt í þrjá flokka eftir því hvar hún á sér stað í virðiskeðjunni. Umfang 1 nær yfir beina losun frá starfsemi fyrirtækisins en umfang 2 og 3 ná yfir óbeina losun sem verður til vegna vöru og þjónustu sem Landsvirkjun kaupir og vegna flutnings raforku til viðskiptavina.

Fyrir utan þessa þrjá flokka sem nefndir eru hér að ofan eru mótvægisaðgerðir og losun á lífrænu CO₂. Kolefnisbinding mótvægisaðgerðanna er gefin upp sér og er notuð í útreikningum á kolefnissporinu. Losun á lífrænu CO₂ frá lónum og brennslu lífræns eldsneytis er tilgreind sérstaklega.

Losun eftir umfangi

Á myndinni hér fyrir neðan má sjá þá þætti sem eru teknir fyrir í losunarbókhaldi ársins og skiptingu þeirra eftir umfangi starfseminnar.

Kolefnisspor 2018

Kolefnisspor Landsvirkjunar fyrir árið 2018 er um 28 þúsund CO₂-ígilda, sem jafngildir 1,94 g CO₂-ígildum/kWst.

Heildarlosun frá rekstri fyrirtækisins* var 53 þúsund tonn CO₂-ígilda. Lífræn CO₂-losun frá uppistöðulónum nam 6,5 þúsundum tonna. 

Binding kolefnis á vegum félagsins var 31,3 þúsund tonn CO₂-ígilda.

*Miðað er við aðferðafræðina Greenhouse Gas Protocol.

Kolefnisspor Landsvirkjunar = heildarlosun gróðurhúsalofttegunda + lífræn losun CO₂ frá lónum - kolefnisbinding.

Losun frá jarðvarma telur mest í heildarlosuninni eða um 77%, þar á eftir er losun lóna tæplega 14%. Auk eigin uppgræðsluverkefna kaupir fyrirtækið bindingu af Kolviði sem jafngildir losun vegna brennslu eldsneytis, úrgangs og flugferða starfsmanna. Með allri kolefnisbindingu ársins er búið að kolefnisjafna 53% af heildarlosun starfseminnar.

Þegar losun er skipt upp eftir því hvar hún á sér stað í virðiskeðjunni kemur í ljós að tæplega 49 þúsund tonn CO₂-ígilda, eða 93% af heildarlosun, eiga sér stað í umfangi 1 sem er bein losun frá starfsemi fyrirtækisins. Losun sem verður til vegna vöru og þjónustu sem fyrirtækið kaupir og vegna flutnings raforku til viðskiptavina í umfangi 2 og 3 er tæplega fjögur þúsund tonn CO_2-ígilda.

Umfang 2 og 3 – óbein losun

Óbein losun nær yfir losun sem á sér stað í virðiskeðju fyrirtækisins, eins og kemur fram á myndinni „Losun eftir umfangi“ hér fyrir ofan.

Sú losun telur um fjögur þúsund CO₂-ígilda, sem er tæplega 7% af heildarlosuninni. Í umfangi 3 er m.a. losun vegna flugferða starfsfólks, innkaupa og framleiðslu áburðar.

Binding kolefnis í gróðri og jarðvegi

Landsvirkjun stuðlar að bindingu kolefnis með uppgræðslu og skógrækt.

Árið 2018 telur binding kolefnis með aðferðum uppgræðslu og skógræktar um 31.300 tonn CO₂-ígilda og er hlutur uppgræðslu um 90%.

Heildarkolefnisbinding hefur aukist um tæplega 9% frá 2017. 

Lífræn CO₂-losun

Árið 2018 var lífræn losun CO₂ frá lónum og vegna brennslu lífræns eldsneytis um 6.500 tonn.

Fyrir losun frá lónum og brennslu lífræns eldsneytis, telst losun á CH₄ og N₂O til beinnar losunar (umfang 1). Losun CO₂ telst sem losun á lífrænu kolefni og er ekki tekin með í samtölu heildarlosunar en er skráð sérstaklega og er hluti af kolefnisspori fyrirtækisins. 

Ekkert umhverfisatvik á árinu

Markmið félagsins er starfsemi án umhverfisatvika.

Umhverfisatvik er skilgreint sem atvik sem fyrirtækinu ber samkvæmt starfsleyfi að tilkynna til umhverfisyfirvalda eða ef eitthvað í starfseminni fer gegn lögum, reglum eða viðmiðum fyrirtækisins.

Á liðnum árum hefur fjöldi atvika verið frá engu og upp í þrettán. Á árinu 2018 varð ekkert umhverfisatvik í daglegri starfsemi fyrirtækisins og aðeins eitt hjá verktaka á vegum Landsvirkjunar. Atvikið tengdist leka á glussa af beltavél í framkvæmdum.