Áhersla á samskipti við nærsamfélag aflstöðva

Meðal annars er árlega gerð áætlun á hverju svæði fyrir sig þar sem fram kemur hvenær á árinu ráðgert er að hitta viðkomandi hagaðila. Er það gert til að tryggja reglubundin samskipti og koma í veg fyrir að atvik eigi sér stað sem hægt væri að koma í veg fyrir með virkri upplýsingagjöf og samskiptum.

Dæmi um slík samskipti á árinu voru heimsókn hagaðila til Blöndustöðvar vegna fyrirhugaðrar vinnu og viðgerða á Gilsárstíflu, vettvangsskoðun með Landgræðslu og hagaðilum sveitarfélaganna á Eyvindarstaðaheiði, veiðifélagsfundir og margir fundir og samráð við Húnavatnshrepp.

Virk samskipti eiga sér einnig stað á vegum sjálfbærniverkefnanna á Austurlandi og Norðausturlandi, auk reglulegra opinna funda og viðburða á vegum Landsvirkjunar. 

Nánari umfjöllun um sjálfbærniverkefnin

Vefsvæði Sjálfbærniverkefnis Austurlands

Vefsvæði Sjálfbærniverkefnis Norðausturlands

Samráð og samskipti í tengslum við framkvæmdir

Búrfellsstöð II

Stækkun Búrfellsvirkjunar lauk á árinu, en Búrfellsstöð II var gangsett í júní 2018. Opið hús var haldið við Búrfell 1. júlí, þar sem gestum gafst færi á að skoða þessa nýjustu aflstöð Íslendinga. Hátt í 700 gestir á öllum aldri skemmtu sér vel í góðu veðri. Á framkvæmdatíma heimsóttu fjölmargir gestir verkstað og fengu kynningu og skoðunarferð um svæðið. Gestahóparnir á framkvæmdatíma voru fjölbreyttir og má nefna til dæmis eldri borgara, nemendur, ljósmæður og karlakór Selfoss. Alls komu um 120 hópar af gestum, bæði innlendir og erlendir, eða í heildina yfir 1.500 manns.

Umhverfisráð var sett á laggirnar á framkvæmdatíma og er það í fyrsta sinn sem slíkt ráð er skipað fyrir framkvæmdaverkefni Landsvirkjunar. Tilgangur umhverfisráðsins var að skapa vettvang fyrir opið samráð við helstu hagsmunaaðila umhverfismála á áhrifasvæði framkvæmdanna. Alls voru haldnir fjórir fundir á framkvæmdatíma, þar af þrír á árinu 2018.

Öryggisráð var einnig starfandi á meðan framkvæmdum stóð til þess að ræða vinnuverndarstarf á verkstað. Alls voru haldnir 16 fundir á framkvæmdatíma, þar af sex á árinu 2018.

Nánar um Búrfellsstöð II

Þeistareykjastöð

Önnur 45 MW vél Þeistareykjastöðvar var tekin í notkun vorið 2018. Margt var gert á árinu til að veita almenningi upplýsingar um verkefnið og framvindu þess. Upplýsingamiðlun var einkum í gegnum fjölmiðla en líka með móttöku gesta. Áframhaldandi áhersla verður lögð á samtal og samráð við almenning vegna Þeistareykjastöðvar og rekstrar hennar.

Á árinu stóð Landsvirkjun fyrir hugmyndasamkeppni í samvinnu við Hönnunarmiðstöð Íslands, en auglýst var eftir tillögu að hönnuðu verki, eða listaverki, sem staðsett yrði í náttúru Þeistareykja. Markmið keppninnar var að fá fram tillögu að verki sem gæti aukið á upplifun þeirra sem leið eiga um svæðið.

Jón Grétar Ólafsson arkitekt hlaut fyrstu verðlaun fyrir tillögu sína sem bar heitið Römmuð sýn og voru verðlaunin veitt 9. október 2018. Sýning á þeim fjórum tillögum sem komust í úrslit í keppninni var haldin í Hönnunarsafni Íslands 10.-14. október og var aðgangur ókeypis. Tillögurnar voru síðan hafðar til sýnis í Safnahúsinu á Húsavík frá 27. október til ársloka.

Nánar um Þeistareykjastöð